एरंडोल शहराच्या मध्यवर्ती मटन मार्केटमध्ये घाणीचे साम्राज्य; नगर परिषद लक्ष देणार कधी?
प्रतिनिधी एरंडोल – शहराच्या मध्यवर्ती भागात असलेल्या मटन मार्केटमध्ये सध्या घाणीचे साम्राज्य पसरले असून नागरिकांच्या आरोग्याचा गंभीर प्रश्न निर्माण झाला आहे. मटन विक्रीदरम्यान निर्माण होणारा कचरा, सांडपाणी, दुर्गंधी व माश्यांचा प्रादुर्भाव यामुळे परिसरातील नागरिकांना मोठ्या त्रासाला सामोरे जावे लागत आहे. मात्र या गंभीर समस्येकडे एरंडोल नगर परिषदेचे दुर्लक्ष होत असल्याचा आरोप नागरिकांकडून केला जात आहे.
मटन मार्केट परिसरात स्वच्छतेची कोणतीही ठोस व्यवस्था दिसून येत नाही. कत्तल केलेल्या प्राण्यांचे अवशेष, रक्तमिश्रित पाणी रस्त्यावर साचलेले असून यामुळे दुर्गंधी पसरली आहे. याच परिसरातून शाळकरी मुले, महिला, ज्येष्ठ नागरिक तसेच रुग्णांची सतत ये-जा असते. अशा परिस्थितीत संसर्गजन्य आजार पसरण्याची दाट शक्यता व्यक्त केली जात आहे.
विशेष म्हणजे, नगर परिषदेच्या आरोग्य विभागाकडून या बाजाराची नियमित तपासणी होत नसल्याचे चित्र आहे. स्वच्छता कर्मचारी अनियमित असून कचरा वेळेवर उचलला जात नाही. परिणामी या भागात डास, माश्या व कुत्र्यांचा सुळसुळाट वाढला आहे. याचा थेट परिणाम नागरिकांच्या आरोग्यावर होत आहे.
परिसरातील रहिवाशांनी याबाबत अनेक वेळा तोंडी तक्रारी केल्या असूनही अद्याप ठोस कारवाई झालेली नाही. “शहराच्या मध्यवर्ती भागातच जर अशी अवस्था असेल, तर इतर भागांचे काय?” असा संतप्त सवाल नागरिक उपस्थित करत आहेत. नगर परिषद फक्त कर वसुलीपुरतीच मर्यादित राहिली असून मूलभूत सुविधांकडे दुर्लक्ष होत असल्याची भावना नागरिकांतून व्यक्त होत आहे.
या पार्श्वभूमीवर मटन मार्केटमध्ये तातडीने स्वच्छता मोहीम राबवावी, नियमित कचरा उचल, सांडपाण्याची योग्य व्यवस्था करावी तसेच आरोग्य नियमांचे उल्लंघन करणाऱ्यांवर कठोर कारवाई करावी, अशी जोरदार मागणी नागरिकांकडून होत आहे.
एरंडोल नगर परिषद या गंभीर प्रश्नाकडे लक्ष देऊन नागरिकांच्या आरोग्याच्या दृष्टीने तात्काळ उपाययोजना करणार का, की नागरिकांना आणखी किती दिवस या घाणीचा त्रास सहन करावा लागणार, असा सवाल आता उपस्थित केला जात आहे.
