प्रतिनिधी एरंडोल :- शहरातील श्रीमती के डी पाटील इंग्लिश मीडियम स्कूल येथे धुलीवंदनाचा सण मोठ्या उत्साहात आणि आनंदात साजरा करण्यात आला. यावेळी शाळेतील सर्व शिक्षकवर्ग, शिक्षकेतर कर्मचारी व विद्यार्थ्यांनी एकत्र येत रंगोत्सवाचा मनमुराद आनंद लुटला.
कार्यक्रमाच्या सुरुवातीला विद्यार्थ्यांना धुलीवंदनाचे सांस्कृतिक व सामाजिक महत्त्व समजावून सांगण्यात आले. रंगांचा सण हा आपापसातील भेदभाव विसरून एकोपा, बंधुभाव आणि आनंदाचे प्रतीक असल्याचे शिक्षकांनी सांगितले. त्यानंतर विद्यार्थ्यांनी सुरक्षित व पर्यावरणपूरक पद्धतीने धुलीवंदन साजरे केले.
शाळेच्या परिसरात रंगांची उधळण, हास्य आणि आनंदाचे वातावरण पाहायला मिळाले. विद्यार्थ्यांनी एकमेकांना अबीर-गुलाल लावून शुभेच्छा दिल्या. शिक्षकवर्गानेही विद्यार्थ्यांसोबत सहभाग घेतल्याने कार्यक्रमाला विशेष रंगत आली.
मुख्याध्यापकांनी आपल्या मनोगतातून विद्यार्थ्यांना सुरक्षितता पाळण्याचे आवाहन करत सण साजरा करताना शिस्त व आनंद यांचा समतोल राखण्याचा संदेश दिला. कार्यक्रमाचे नियोजन शिस्तबद्ध पद्धतीने करण्यात आल्यामुळे सर्वांनी आनंददायी वातावरणात धुलीवंदन साजरे केले.
या रंगोत्सवामुळे शाळेत उत्साहाचे आणि आनंदाचे वातावरण निर्माण झाले होते.
